അന്നജം (starch) വിഷമല്ല. ധാന്യങ്ങളില്‍ ആണ് ഇതുള്ളത്. ഏറെ പ്രചാരത്തില്‍ ലോകമാകെ വിറ്റഴിയുന്ന പ്രമുഖ കമ്പനിയുടെ മഞ്ഞള്‍ പ്പൊടി, മുളകു പൊടി തുടങ്ങിയ ഉല്‍പ്പന്നങ്ങളില്‍ അമിത തോതില്‍ അന്നജം കണ്ടെത്തിയതിനെ തുടര്‍ന്ന് ഭക്ഷ്യ സുരക്ഷാ വകുപ്പ് മേധാവി ആ ഉല്‍പന്നങ്ങള്‍ നിരോധിക്കുന്നു (മഞ്ഞളിലോ മുളകിലോ അന്നജം അടങ്ങിയിട്ടില്ല; അതിന്റെ പൊടിയില്‍ അന്നജം കണ്ടെത്തുക എന്നാല്‍ മായം കലര്‍ന്നു എന്ന് തന്നെയാണ്).

ഫേസ് ബുക്കികളും മറ്റു സോഷ്യല്‍ മീഡിയ പ്രവര്‍ത്തകരും ധീരമായ ഈ നടപടിയെ പിന്തുണച്ച് പോസ്റ്റുകള്‍ കാച്ചുന്നു. ഇന്നിപ്പോള്‍ കാര്യങ്ങള്‍ മലക്കം മറിഞ്ഞതായി വാര്‍ത്തകള്‍ വരുന്നു. അമ്പത് കോടി രൂപയാണ് ഈ ഉദ്യോഗസ്ഥയില്‍ നിന്ന് കമ്പനി നഷ്ടപരിഹാരമായി ആവശ്യപ്പെട്ടിരിക്കുന്നത്!

അന്നജം കണ്ടെത്തി എന്നത് ശരിയാണെങ്കിലും അത് കഴിക്കുന്നത്‌ ഉപഭോക്താക്കള്‍ക്ക് അപകടം ഉണ്ടാക്കും എന്ന് വ്യക്തമാക്കുന്നതില്‍ പരാജയപ്പെട്ടു എന്നാണ് നീതിപീഠത്തിന്റെ കണ്ടെത്തല്‍.

നമ്മുടെ നീതി പീഠം അങ്ങനെയാണ്; കണ്ണ് മൂടിക്കെട്ടി രാഷ്ട്രീയ ദുഷ്പ്രേരണകളുടെയും ഉപജാപങ്ങളുടെയും അന്ധകാരങ്ങളില്‍ തപ്പിത്തടഞ്ഞ് പലര്‍ക്കും അനര്‍ഹമായ നിയമപരിരക്ഷ നല്‍കും.

ഡസന്‍ കണക്കിന് ആള്‍ക്കാര്‍ ചുരുങ്ങിയ ദിവസം കൊണ്ട് രാത്രിയെന്നോ പകലെന്നോ വ്യത്യാസമില്ലാതെ ലൈംഗികമായി ഉപയോഗിക്കപ്പെട്ട പെണ്‍കുട്ടി (സൂര്യനെല്ലി) രക്ഷ പെടാന്‍ അവസരം ഉണ്ടായിട്ടും അത് ചെയ്തില്ല എന്ന ന്യായം പറഞ്ഞ് അവള്‍ക്ക് നീതി നിഷേധിക്കുകയും ചെയ്യും!

ഭക്ഷണ പൊടികളില്‍ മായം കലര്‍ത്തി കോടികള്‍ വിറ്റുവരവ് നേടിയ കമ്പനി നിരപരാധിയാണെന്ന്; ദുഷ്ചെയ്തിക്കെതിരെ നടപടിയെടുത്ത ഉദ്യോഗസ്ഥ തെറ്റുകാരിയും. ദുഷിച്ച വ്യവസ്ഥിതികള്‍ക്കെതിരെ പ്രതികരിക്കുന്നവര്‍ക്കുള്ള താക്കീതു കൂടിയായി ഈ കോടതി വിധിയെ കരുതാം.